Amor: ‘Die tyd sal leer wat van ons gaan word’
2010-05-29 09:37
Johannesburg - Die sangeres Amor Vittone en haar man, die gewese Bok-held Joost van der Westhuizen, is uitmekaar nadat sy tot die besef gekom het sy “vertrou nie meer vir Joost nie”.
“Dinge het in die laaste tyd gebeur wat my weer laat wantrou het. As hy iets sê wat nie die volle waarheid is nie, is dit vir my ’n groot krisis,” sê Amor in ’n onderhoud met die jongste Huisgenoot. Die tydskrif is van Maandag af te koop.
Die egpaar is tien dae gelede van tafel en bed geskei. Sy bly met die kinders in die spoglandgoed Dainfern noord van Johannesburg en Joost bly by ’n vriend.
“Die verhouding is op ys,” het Amor dié week aan Huisgenoot gesê.
“My en Joost se besluit om tydelik ons paaie te laat skei, beteken hoegenaamd nie dat ons op die punt van ’n egskeiding staan nie. Die tyd sal leer wat van ons gaan word. Miskien sal ons oor ’n week, oor drie maande of oor ’n jaar weet wat die lewe vir ons inhou.”
Sy onthul ook dat Joost in Augustus verlede jaar vir haar gesê het “hy dink” dit is hy in die berugte seksvideo wat die hele drama ontketen het.
Sy sê sy het aanvanklik verstaan waarom hy vir haar en die wêreld gejok het “omdat hy bang was”.
“Maar ses maande lank. Dis wat my baie seergemaak het.”
Amor vertel ook hoe die twyfel in haar gegroei het, veral nadat mense vir haar gesê het sy is dom, sy moet haar oë oopmaak.
Vrydag het Amor aan Philip de Bruin gesê: “Ek het gedink stilbly is die antwoord, maar dit is nie.”
Joost het Vrydagmiddag gesê hy het “die wêreld se respek” vir sy vrou en hul twee kinders. “Ek sal alles in my menslike vermoë doen om ons huwelik te laat werk ondanks die skeiding. “Alles wat nou gebeur, is immers my skuld. Ék moet dit regmaak.”
- Volksblad