Amerikaner ook in Pta hof oor DRK-komplot

2013-02-07 15:07

Johannesburg – 'n Amerikaner is een van 19 mense wat Donderdag in die Pretoriase streekhof verskyn het op aanklag dat hulle saamgesweer het om die regering van die Demokratiese Republiek van die Kongo omver te werp.

'n Woordvoerder van die Amerikaanse ambassade het aan die nuusagentskap dpa gesê die man is geïdentifiseer as James Kazongo – 'n man van Kongolese herkoms. 'n Amerikaanse diplomaat sal Kazongo vandeesweek besoek. Dit is nie bekend hoe hy die land binnegekom het nie.

Kazongo en 18 mense is Dinsdag in Limpopo in hegtenis geneem op aanklag dat hulle artikel twee van die Wet op Buitelandse Militêre Steun oortree het.

Volgens die aanklaers kom hulle optrede neer op dié van huursoldate, berig RSG.

Hulle het ook groot hoeveelhede wapens bekom wat insluit outomatiese aanvalsgewere, granate en lug-tot-lug missiele. Die verdagtes is na bewering ontevrede met die regering van die president Joseph Kabila.

– Volg Nuus24 op Twitter

- SAPA