Ambulanse moet tolgeld betaal by Chapmanspiek
2012-01-17 11:01
Kaapstad – Die mediese direkteur van Cape Medical Response het gehoor dat sy ambulanse tolgeld moet betaal as hulle Chapmanspiek-rylaan gebruik – ongeag of daar ‘n noodgeval is, het die Cape Times Dinsdag berig.
Alan Walters het aan die koerant gesê hy was stomgeslaan toe hy uitvind dat ambulanse nie as ‘n uitsondering gesien word nie.
“Dis ongelooflik, regtig nonsens,” het hy gesê.
“Ek praat nie daarvan om na ‘n vergadering te gaan in ‘n reaksiemotor nie, ek praat van ‘n ambulans met flitsende ligte en ‘n kritieke pasiënt agterin.
“Dit het gebeur terwyl die ouens op roep was en hulle ‘n oproep ontvang het om na Houtbaai te gaan om ‘n pasiënt in ‘n noodgeval na Constantiaberg te vervoer.
“Hulle is by die tolhek gestop en moes rondkrap om geld bymekaar te kry om die tolgeld te betaal,” het Walters gesê.
Die voorval het verlede maand plaasgevind.
Walters het aan Rob Pomario, direkteur van Entilini-padoperateur, geskryf, om te vra dat ambulanse kwytgeskeld kan word van tolgelde wanneer hulle ‘n mediese noodgeval het “sodat waardevolle sekondes gespaar kan word”.
“Al ons voertuie kan onmiddellik geïdentifiseer word, met naamborde en noodligte,” het hy geskryf.
Pomario het teruggeskryf om te sê hy kan nie die ambulanse kwytskeld van tolgelde nie.
Hy het voorgestel dat die ambulanse "alyd los kontant by hulle het om enige vertragings te voorkom”.
“’n Alternatief is om met ons operateur te gesels oor ons gereelde gebruiker fasiliteit.
“Die staatskoerant is baie duidelik oor watter voertuie as noodvoertuie geag moet word,” het Pomario geskryf.
Walters het aan die premier van die Wes-Kaap, Helen Zille, geskryf om te sê sy ambulansdiens word nie kwytgeskeld van tolgelde wanneer dit op noodgevalle reageer nie.
“Dit beteken oproepe van lewe en dood. U opinie sal waardeer word.”
Walter het gesê die premier se kantoor het teruggeskryf om te sê die kantoor sal tot middel Januarie gesluit wees en hy het sedertdien nog niks gehoor nie.
– Volg Nuus24 op Twitter
- SAPA