Alle skole het probleme met geweld, sê skoolhoof
2011-08-31 08:59
Welkom – Skole moet dit maar erken, almal het probleme met geweld, niemand is te “grand” daarvoor nie.
Só sê Gunter Henrichs, skoolhoof van die Hoër Tegniese Skool in Welkom.
Hy en ander Welkomse skoolhoofde het by navraag van Volksblad oor geweld in skole gereageer na aanleiding van die video van twee skoolmeisies van die Goudveld-Hoërskool wat handgemeen geraak het.
Gert Viljoen van die Hoërskool Riebeeckstad sê hy wil weet waar is die ouers. “Hoekom moet skoolhoofde pa staan vir kinders se optrede?
“Ons het lanklaas ’n ernstige voorval by die skool gehad waar kinders in ’n bakleiery was, maar ons probeer altyd om die rede vir die konflik uit te skakel.
“Die dinge moet terug na die kinders se huise gevat word. Ouers moet opgevoed word. Kinders word op soveel terreine aan geweld blootgestel. Hulle moet geleer word hoe om konflik te hanteer.”
Viljoen sê meisies is geneig om mekaar meer verbaal aan te val en dit gebeur nie sommer op die skoolterrein dat twee meisie mekaar slaan nie.
Hy laat nie selfone in sy skool toe nie.
Heinrichs sê kinders word nie engeltjies wanneer hulle by ’n skoolhek instap nie. “Bakleiery is nie ’n nuwe ding nie, maar die neem van selfoonvideo’s blaas die ding aan.
“In al die chaos rondom ons, probeer ons kinders op die regte pad hou. ’n Mens kan egter nie altyd oral wees nie.”
Hy sê voorvalle van geweld reflekteer sleg op die gemeenskap. “Ons skors nie sommer ’n kind nie, maar ons maatskaplike ondersteuningstelsel daarbuite is besig om in duie te stort.”
Rudolf Cloete, skoolhoof van Welkom-Gimnasium, sê bakleiery tussen seuns kom nog al die jare voor en word volgens die skool se gedragskode hanteer.
“Ek het al voorvalle gehad waar een meisie ’n ander een geklap het en die ouers is ingeroep en die probleem opgelos.”
Hy sê in sy ervaring vind die rede vir skoolbakleiery gewoonlik buite die skool plaas.
Kallie Scott, skoolhoof van Goudveld-Hoërskool, het gister sy stilswye ná die berig oor die video waar twee skoolmeisies baklei, in ’n brief aan Volksblad verbreek.
Hy wei onder meer oor die skool se prestasies uit. “Vir jare is ons skool op veral akademiese gebied die toonaangewende skool in Lejweleputswa en was die voorbladdekking van ’n negatiewe insident in ons skool seker te wagte. Ons betreur die voorval aangesien dit die waardigheid van ons skool en in besonder die van ons pragtige, welopgevoede leerders aantas. Natuurlik is die gedrag van die betrokke leerlinge onaanvaarbaar en sal ons dit volgens die skool se gedragskode hanteer.”
Volg Nuus24 op Twitter.
- Volksblad