Alle kleure boude nou welkom by kaal-oord
2010-07-03 09:49
Rapport
Bronkhorstspruit – Wie sê nog die Wêreldbeker-sokker het nie sy deel vir nasiebou gedoen nie?
Ná jare se aandrang dat slegs blanke boude by sy oorde gesien sal word, het die kaalbaskoning Beau Brummel die afgelope week aangekondig hy sal voortaan saam met Suid-Afrikaners van enige kleur kaal paradeer.
En wat het dié gemoedsommeswaai teweeggebring?
“Noudat ek gesien het hoe lekker wittes en swartes by die sokker meng, het ek besluit dit is die rigting om in te slaan. Geen meer ‘slegs blankes’ vir my nie,” vertel Brummel met sy vuvuzela in sy hand in sy agterplaas in Bronkhorstspruit.
“Nou is ek gelukkig. Ek wil net op hierdie ding blaas en kaal die berge invaar.”
So begeesterd is Brummel dat selfs sy beplande nuwe oord in die Drakensberge – waar kaalbasse vanaf September gaan kuier op die einste plek waar die Voortrekkers gedreig het om kaalvoet oor die kruin te kom – vir alle rasse oop sal wees.
“En as dit enigiemand omkrap om swart mense kaal te sien, kan hulle maar wegbly,” sê Brummel.
Die koning van Suid-Afrikaanse naturisme was deur die jare gereeld in die nuus oor die omstrede rassebeleid van sy nudisme-oorde. Hoewel hy vertel dat hy aanvanklik progressiewe waardes aangehang het, het sy planne om Beau Valley – sy aanvanklike oord naby Warmbad – vir alle rasse oop te stel, tot ’n botsing met aandeelhouers gelei wat hom uiteindelik dié oord gekos het.
Daarna het Brummel besluit om nie-rassigheid sy stertkant te wys. By ’n latere oord waar hy betrokke was, Jane’s Jungle in die noorde van KwaZulu-Natal, was daar selfs ’n bordjie by die ingang wat gelui het “Slegs blankes”. En in die 1990’s was hy betrokke by pogings om Sandy Bay weer tot wit strand te verklaar.
Nog onlangs wou Brummel ’n naturisme-oord op Orania begin vir oorsese besoekers tydens WB 2010.
“Ek het gedink dit sou heerlik wees – kaalgat, met braaivleis, bier en dr. Hendrik Verwoerd se standbeeld op die agtergrond. Volk en vaderland! Maar Carel Boshoff, die kerke en die Vrouefederasie het my almal teengestaan.”
Nou is Brummel bly dié Orania-planne het nie uitgewerk nie. “Die verwagte 300 000 Europese besoekers vir die Wêreldbeker-toernooi het nie opgedaag nie en die winter is vriesend koud. Dit sou ’n flop gewees het. Totsiens Orania!”
Brummel krap egter kop oor die vraag of sy nuwe ingesteldheid ’n daadwerklike verskil aan naturisme-oorde sal maak.
“Selfs oorsee sien ek die naturisme-oorde trek net wit mense. Miskien het wit mense die son meer nodig.”
- Rapport
