Alle hel glo los oor Amor se ‘skelmpie’
2010-08-10 07:45
Die Burger
Kaapstad - “Alle hel” het tussen die oud-Springbok Joost van der Westhuizen en sy vervreemde vrou, die sangeres Amor Vittone, losgebars.
Die vyandskap tussen die twee is só erg dat Van der Westhuizen sy twee kinders, Jordan (6) en Kylie (4), ’n week laas gesien het.
“Alle hel het tussen hulle losgebars,” het ’n bron na aan die egpaar gesê.
In nog ’n verwikkeling is dit Maandag aan Die Burger bevestig dat die geheimsinnige derde persoon wat met die egskeiding verbind word ’n man is en dat hy na bewering aan Vittone gekoppel word.
Ondanks bespiegelings die naweek dat Vittone by een of meer Suid-Afrikaanse sangers “aanlê”, is dit Maandag bevestig dat die man nié ’n Suid-Afrikaner is nie. “Hy is ’n buitelander, maar nie ’n Italianer nie.” Vittone is Italiaans.
Van der Westhuizen het tot baie onlangs nog, toe daar sprake was dat die egpaar hul huwelik wil red, sy twee kinders daagliks by die skool gaan aflaai en weer smiddae gaan oplaai.
Dit doen hy nou nie meer nie. Hy sit nie sy voete in die egpaar se spoghuis in Dainfern Valley in Johannesburg nie. Hy en Vittone praat geen woord met mekaar nie. Hy kontak sy kinders net per SMS.
Van der Westhuizen gaan steeds by ’n vriend tuis nadat hy die huis in Mei verlaat het.
Van der Westhuizen se prokureur, Robert Klinkenberg, wou Maandag nie inligting bevestig of ontken wat die bron bekend gemaak het nie.
“Ek kan wel bevestig dat daar ’n derde party in die hofstukke genoem word.
“Joost is baie bekommerd oor sy kinders en die feit dat hy hulle tans nie sien nie.”
Hy het gesê gesprekke sal vandeesweek voortgaan met die oog op ’n skikking.
Volg Nuus24 op
Twitter
- Die Burger