Alkoholverbod is dalk motoriste se voorland
2011-09-27 08:02
Kaapstad - Motorbestuurders wat gedrink het, gaan dalk in die nabye toekoms nie toegelaat word om agter die stuurwiel in te klim nie, selfs al het hulle net een drankie agter die blad.
Die regering oorweeg ’n totale alkoholverbod vir motorbestuurders, óf om die alkoholperk van 0,05% tot 0,02% alkohol per 100 ml bloed te verlaag.
Daar gaan ook strenger opgetree word teen bestuurders wat nie hul sitplekgordels dra nie.
Hierdie drastiese plan deur die minister van vervoer, S’bu Ndebele, het ten doel om die getal sterftes op die Suid-Afrikaanse paaie te halveer.
Daar is reeds besluit nuwe bestuurders wat hul rybewyse kry, sal vir ’n tydperk van twee tot drie jaar glad nie mag alkohol drink voordat hulle bestuur nie.
Daar is egter nog nie besluit van wanneer dié reël toegepas gaan word nie, het Gary Ronald, woordvoerder van die Automobiel-Assosiasie, Maandag gesê.
“Dié ‘voorlopige rybewyse’ sal ná die aanvanklike tydperk outomaties in volwaardige rybewyse omgeskakel word as die betrokke persoon in dié tydperk geen oortredings begaan het nie.”
Logan Maistry, woordvoerder van die departement van vervoer, het Maandag gesê: “Op die oomblik is die plan óf dat die bestaande perk verlaag word tot 0,2% alkohol per 100 ml bloed van die bestaande 0,5% óf dat die alkoholperk heeltemal afgeskaf word en dat geen toegewing gemaak sal word nie.
As ’n verbod op enige mate van drink en bestuur ingestel word, sal oortreders in hegtenis geneem kan word en hul rybewyse verloor as hulle dit wel doen.
Maistry het gesê Ndebele is besig om alle relevante partye te raadpleeg om te bepaal of die wetgewing deurgevoer moet word en hoe ver dit moet gaan. “Die minister is doodernstig hieroor.”
Ronald het gesê studies in ander lande het gewys ’n algehele verbod kan padsterftes met tot 30% verminder.
Die Padverkeerbestuurskorporasie sal ’n algehele verbod op drankgebruik ten volle steun, het Ashref Ishmail, woordvoerder, gesê.
“Sulke wetgewing sal ’n reuse-verskil maak.
“Tot 45% van al die noodlottige padongelukke in Suid-Afrika, veral oor naweke, word deur alkoholmisbruik veroorsaak,” het hy gesê.
Volg Nuus24 op Twitter.
- Die Burger