Fotograaf geprys vir toewyding
2012-10-22 12:45
Johannesburg – Die bekroonde Suid-Afrikaanse fotograaf Alfred Kumalo se werk oor die lewe van oudpres. Nelson Mandela sal vir ewig gekoester word, het die Nelson Mandela-gedenksentrum Maandag gesê.
Kumalo (82) het Sondag in die ouderdom van 82 weens nierversaking in 'n hospitaal in Johannesburg gesterf.
"Die Nelson Mandela-gedenksentrum het oor die jare nou saam met Bra' Alf aan verskeie projekte gewerk. Ons sal sy ryk werk koester, sy toewyding aan sy kuns, sowel as sy "ouwêreldse sjarme"," het Sello Hatang, woordvoerder, in 'n verklaring gesê.
Kumalo het Mandela se lewe voor en ná sy gevangenisskap uitgebeeld.
"Sy loopbaan as fotograaf, wat in 1951 begin het, het die begin van mnr. Mandela se politieke loopbaan uitgebeeld en Bra Alf het baie historiese geleenthede, waarin hy 'n belangrike rol gespeel het, afgeneem."
"Hamba kahle Bra Alf. Ons gaan jou mis."
Diegene wat saam met hom gewerk het, het sy professionaliteit geprys.
"Wat hy gedoen het, het hy goed gedoen en hy was 'n baie goeie storieverteller," het Hebert Mabuza, besturende redakteur van Sowetan, gesê.
Mabuza en Kumalo het in die 1980's saam by The Star gewerk.
In sy aftrede het hy die Kumalo Photographic Museum in Diepkloof, Soweto bestuur en het ten spyte van sy ouderdom steeds as 'n professionele fotograaf gewerk en 'n fotografieskool in Diepkloof bestuur.
– Volg Nuus24 op Twitter
- SAPA
