Aktrise het al 'probeer selfmoord pleeg'
2010-08-19 06:49
Die Burger
Kaapstad - Twee briewe is gisteroggend by die lyk van Fiona Coyne (45), bekende aktrise en TV-aanbieder, in haar huis in Vishoek gevind nadat haar huishulp op haar afgekom het.
Die briewe was aan haar ma, Dolly Coyne, en haar huishulp, Zoleka Shumani, gerig.
Volgens ’n familiewoordvoer, Kee-Leen Irvine, het Coyne vermoedelik selfmoord gepleeg, berig Sapa.
Shumani het omstreeks 08:40 op Coyne se lyk in haar slaapkamer afgekom. Sy het op haar bed gelê.
Shumani het die nooddienste ontbied.
’n Polisiewoordvoerder, kapt. Stephen Knapp, het gister aan Die Burger gesê geen misdaad word vermoed nie. “ ’n Geregtelike doodsondersoek sal gedoen word,” het hy gesê.
’n Betroubare bron het aan Die Burger gesê Coyne het verlede week ook probeer selfmoord pleeg.
Coyne was veral bekend as die spitsvondige aanbieder van die Suid-Afrikaanse weergawe van The Weakest Link, waarin deelnemers gereeld onder haar oënskynlik bitsige kommentaar deurgeloop het.
Sy was ook ’n ervare en gesiene persoonlikheid in die teaterwêreld.
Familie en vriende, onder wie haar broer Charles en haar ma, Dolly, is gister by die huis deur ’n berader ondersteun.
Twee polisievoertuie en ’n nooddiensvoertuig was met Die Burger se besoek buite die huis. Coyne se twee honde was op die perseel.
Coyne se lyk was in ’n bruin kombers toegedraai toe die polisie dit omstreeks 13:55 uit die huis verwyder het.
“Die wêreld is vandag ’n slegter plek sonder haar,” het ’n duidelik ontstelde Charles Coyne gesê. “Sy was ’n merkwaardige en deernisvolle mens.”
Hy het gesê hul broer, Bruce, van Pretoria, is diep geskok oor haar skielike dood.
“Ons wag net totdat hy kalmeer en dan sal ons sy reisplanne uitsorteer.”
Mario Brierava, Coyne se buurman, het gesê haar dood is ’n groot skok.
“Sy was eintlik ’n baie vriendelike mens, glad nie soos sy op The Weakest Link voorgegee het om te wees nie.”
Coyne was 22 jaar lank met Willie Fritz getroud en die paartjie se paaie het sowat agt maande gelede geskei.
Hulle het nie kinders nie.
Volg Nuus24 op Twitter
- Die Burger