Airlink hou sy vlerke
2009-12-14 22:45
Johannesburg - Die departement van vervoer sê SA Airlink se vlugte gaan nie opgeskort word nie, maar dié redery het tot Maandag om seker te maak dat sy onderhoudsprogram aan die veiligheidstandaarde voldoen.
Thami Ngidi, 'n woordvoerder van die departement van vervoer, het gesê Airlink kan sy dienste voortsit op die voorwaarde dat hy 'n paar kwelpunte onmiddellik aanspreek en 'n plan van aksie soos deur die burgerlugvaartregulasies aangevra, inhandig.
'n Oudit wat deur die Suid-Afrikaanse Burgerlugvaartowerheid (BLO) gedoen is, het drie waarnemings en voorstelle oor Airlink se vlugoperasies gemaak en 12 bevindings oor Airlink se onderhoudsprogram.
Die BLO sal nie sy verslag aan die publiek bekendmaak nie.
Die BLO het Vrydag sy bevindings aan die minister van vervoer, Sibusiso Ndebele, voorgelê en dit met Airlink se bestuur bespreek.
Volgende week gaan die BLO se inspekteurs Airlink se verbeterings evalueer.
Die besluit om nie Airlink se vlugte op te skort nie, volg ná drie ongelukke in drie maande.
'n Airlink-vliegtuig met 30 passasiers aan boord het verlede Dinsdag die landingstrook op die George-lughawe in nat weer gemis.
'n Vlieënier is in een van dié ongelukke dood.
– Sapa