Agtjarige moontlik deur krokodil geëet
2009-12-24 20:21
Johannesburg – Daar word vermoed dat ‘n agtjarige seun in ‘n rivier in Ngoleni in Eshowe verdrink het, het polisie in KwaZulu-Natal Donderdag gesê.
Nkonzo Nzuza en ‘n vriend het Woensdag in ‘n rivier gaan swem nadat hulle gestuur is om water vir Nzuza se ma te gaan haal, het kapt. Tienkie van Vuuren in ‘n verklaring gesê.
“[Sy vriend] het na ‘n ruk besluit om huis toe te gaan en het gesê Nkozo moet saamkom, maar Nkonzo wou nog swem.”
Nokuthula Zulu, Nkonzo se ma, het die ander kind gevra waar haar seun is en het georganiseer dat daar ‘n soektog van die rivier gemaak word.
“;n Soektog is geloods, maar Nkonzo kon nie opgespoor word nie. Sy klere het nog op die rivierbank gelê. Gemeenskapslede het tot donker langs die rivierbanke gesoek, en weer vanoggend, maar daar was geen sukses sover nie.”
Daar word vermoed dat Nkonzo óf verdrink het, óf deur ‘n krokodil geëet is.
Baie krokodille is die afgelope tyd in die omgewing gesien.
Polisie het ook die area deursoek, maar geen polisieduikers is ingestuur nie as gevolg van die krokodille.
- Sapa