Agterstand met skole beloop R140 miljard
2010-03-24 06:58
Kaapstad - Die agterstand met die bou en opknapping van skole beloop tans R140 miljard en dit sal die regering 20 jaar neem om uit te wis.
Só het Angie Motshekga, minister van basiese onderwys, Dinsdag in haar begrotingsrede in die Nasionale Vergadering gesê.
Sy het egter bygevoeg dat haar departement gaan probeer put uit die vaardighede en momentum wat die boubedryf gedemonstreer het en wat daartoe gelei het dat die stadions vir die komende Wêreldbeker-sokkertoernooi betyds voltooi is.
“Die departement sal hierdeur probeer om sy eie infrastruktuur-agterstand ook gouer uit te wis,” het sy gesê.
Die departement van basiese onderwys se begroting vir 2010-’11 is R6,2 miljard, waarvan R474 miljoen vir studiebeurse vir voornemende onderwysers gebruik sal word – veral in skaars vakgebiede soos wiskunde en wetenskap.
Motshekga het klem gelê op die R11 miljoen wat bewillig is vir die nuwe eenheid vir onderwysevaluering en -ontwikkeling (Needu) wat die werkswyse van skole en distrikte sal monitor.
Nog R10 miljoen is opsy gesit vir die jaarlikse toetsing van leerders in gr. 3, gr. 6 en gr. 9 om seker te maak dat leerders oor aanvaarbare vlakke van geletterdheid en syfervaardigheid beskik.
Fatima Chohan, ANC-LP en voorsitter van die portefeuljekomitee oor basiese onderwys, het in reaksie gesê die portefeuljekomitee sal nie swak dissipline van onderwysers duld nie en sal ook nie toelaat dat die departement van onderwys dit duld nie.
“Onderwysers moet betyds wees en hul vakgebied ken en dit moet gemonitor word.”
Junita Kloppers-Lourens, DA-woordvoerder oor onderwys, het haar kommer uitgespreek oor die hoë uitvalkoers van leerders wat volgens haar op 77% geraam word en nie 33% soos wat Motshekga vroeër aan die parlement gesê het nie. “Die minister het die uitvalkoers hopeloos onderspeel.”
Alfred Mpontshane van die IVP het sy kommer uitgespreek oor die feit dat die onderwysvakbond Sadou gekant is teen klaskamer-inspeksies. “Klaskamers is tans niks anders as swart bokse nie – niemand weet wat daarbinne aangaan nie.”
James Lorimer, DA-LP, het gesê die departement moet onthou hy is nie daar om onderwysvakbonde se belange te dien nie, maar om onderrig aan kinders te gee. Hy het Motshekga herinner aan haar uitspraak dat onderwyseropleiding nie in skooltyd sal geskied nie terwyl hy weet dit het.
- Die Burger