Agt plaaswerkers dood, talle beseer in gru-ongeluk
2012-01-30 12:05
Kaapstad – Agt mense is dood en tientalle is beseer nadat ‘n vragmotor, wat 56 plaaswerkers vervoer het, Maandagoggend op ‘n brug in die Wes-Kaap omgeslaan het, het Keri Davids, woordvoerder van die provinsiale departement van gesondheid se nooddienste, in 'n verklaring gesê.
Die ongeluk het glo plaasgevind toe ‘n vragmotor, wat plaaswerkers vervoer het, in die rigting van Wolseley op die R45 tussen Gouda en Ceres teen ‘n stilstaande oesmasjien gebots het.
Die impak van die slag het veroorsaak dat die vragmotor se sleepwa by die brug af val en in die rivier beland.
Nooddienspersoneel het twee en ‘n half uur lank gewerk om die pasiënte op die toneel te stabiliseer.
Agt mense is op die toneel dood en agt ander het kritieke beserings opgedoen.
Davids het gesê 22 plaaswerkers het ligte tot ernstige beserings opgedoen, terwyl 18 ander ligte beserings opgedoen het.
‘n Discovery-helikopter het een kritiek beseerde pasiënt na ‘n gesondheidsfasiliteit geneem en 54 van die pasiënte is na die Paarl-hospitaal, Paarl Mediclinic en Tygerberg-hospitaal geneem.
– Volg Nuus24 op Twitter