Agt bedank uit Cope oor 'diktator Lekota'
2011-08-02 09:09
Johannesburg - Agt ampsdraers van Cope, onder wie Lindeka Liwani, adjunkleier van dié party in die Oos-Kaap, het Maandag uit die party bedank.
In ’n mediaverklaring het die groep telkens na Mosiuoa Lekota, Cope-leier, as ’n diktator verwys en ernstige bewerings teen hom en die party as rede vir hul bedanking aangevoer.
Hulle het beweer salarisse is weerhou van Cope-lede wat Lekota nie as partyleier ondersteun nie en dat ondersteuners van Mbhazima Shilowa, medestigter van die party, valslik van korrupsie beskuldig is in ’n poging om van hulle ontslae te raak.
“Ons het vervolging, lastering, suiwering en vergelding gesien teenoor diegene wat teen die omstrede diktator en voormalige minister van verdediging, Patrick Lekota, standpunt ingeneem het.”
Noziphiwo Jafta, voormalige Cope-sekretaris in die O.R. Tambo-streek en woordvoerder van die groep, het bevestig dat die bedankings finaal en onmiddellik van krag is.
Cope is sedert sy totstandkoming in 2008 gewikkel in ’n leierstryd tussen Lekota en Shilowa wat grootskaalse verdeeldheid in die party veroorsaak het.
Shilowa het verlede jaar ’n hofgeding teen Lekota verloor en die hof het beslis Lekota is Cope se regmatige leier, maar dit het nie ’n einde aan verdeeldheid in die party gebring nie.
Phillip Dexter, nasionale Cope-woordvoerder, het Maandag gesê die lede wat bedank het is deel van die Shilowa-faksie.
“Hulle het geen status binne die party nie.
“Hulle beweer hulle is voorsitters en wat nog, maar hulle is nie. Hulle is aangestel by ’n verkiesingskongres wat weens onreëlmatighede nie deur die party erken word nie,” het Dexter bygevoeg.
Luidens die mediaverklaring beklee die lede wat bedank het posisies van onder meer streeksekretaris, verkiesingskoördineerder en adjunkvoorsitter van Cope se jeugbeweging.
Almal is afkomstig van die O.R. Tambo-streek in die Oos-Kaap.
Prof. André Duvenhage, dosent in politieke wetenskap aan die Noordwes-Universiteit, het gesê as dié bewerings waar is, is dit moontlik ’n strategiese skuif van die Lekota-faksie om die party te suiwer.
“Daar is geen twyfel dat Lekota op die oomblik via regsprosesse die botoon in die magstryd binne die party voer nie, en hy is besig met ’n proses van huis skoonmaak en om sy magsbasis te konsolideer.”
Volg Nuus24 op Twitter.
- Beeld