Agliotti se foonrekord moontlik ‘gedokter’
2010-08-17 07:31
Die Burger
Johannesburg - Selfoonrekords van Glenn Agliotti wat hy self “deur ’n kontak” in die hande gekry het en wat nie ooreenstem met die amptelike MTN-rekords nie, is Maandag beskryf as moontlik “gedokter” of “vervals”.
Hilda du Plessis, ’n forensiese data-analis van MTN, het in die Suid-Gautengse hooggeregshof getuig selfoonrekords word net gegee as ’n landdros ’n aansoek deur die polisie goedkeur, of deur die Wet op die Bevordering van Toegang tot Inligting te gebruik.
Die inligting van Agliotti se kontak is klaarblyklik nie deur een van die twee metodes bekom nie.
Regter Frans Kgomo het die hof vroeg verdaag en Du Plessis huis toe gestuur om Dinsdag vir hom amptelike bewyse te bring dat MTN nét in daardie twee gevalle inligting oor selfoonrekords gee.
Adv. Laurance Hodes SC, vir Agliotti , was besig om in kruisondervraging uit te wys dat Agliotti se eie lys nie ooreenstem met MTN se amptelike lys nie, toe adv. Kholeka Gcaleka, vir die staat, wou weet waar die lys vandaan kom.
Agliotti ontken skuld op aanklagte van moord, poging tot moord en sameswering tot moord op onder andere Brett Kebble.
Terug in die getuiebank het Du Plessis gehou by haar punt dat daar net twee wetlike maniere is om rekords in die hande te kry.
Kgomo wou weet of hy op versoek sy eie volledige rekords van MTN kon kry, en Du Plessis het getuig hy kan nie. Kgomo het die hof verdaag sodat Du Plessis dokumentasie aan die hof kan wys, want “daar is insinuasies dat daar vervalste of gedokterde getuienis voor die hof is”.
Du Plessis het vroeër van haar amptelike rekords af getuig dat daar op 26 September 2005 van omstreeks 20:00 tot 22:30 talle oproepe was tussen Agliotti, Kebble en mnr. Clinton Nassif, die selferkende moordbeplanner.
Volg Nuus24 op Twitter
- Die Burger