Agliotti lieg glo gereeld
2009-10-14 07:21
Magdel Fourie en Marga Ley
Johannesburg - "Ja, ek lieg van tyd tot tyd,” het Glenn Agliotti gister onder eed in die verhoor van Jackie Selebi, voormalige polisiehoof, erken.
Agliotti, hoofstaatsgetuie, het ná intensiewe kruisverhoor deur adv. Jaap Cilliers SC, namens Selebi, in die hooggeregshof in Johannesburg erken hy sal lieg as dit vir hom geldelike of enige ander voordele inhou.
Dit het gevolg nadat Agliotti toegegee het die inhoud van sy beëdigde verklaring op 4 Januarie 2007 aan die Nasionale Intelligensie-agentskap (NIA) was “slegs gedeeltelik waar”.
Selebi het dié verklaring van Agliotti later gebruik in ’n mislukte poging om die aanklagte teen hom geskrap te kry.
Die oudpolisiehoof het verlede week skuld ontken op aanklagte van korrupsie en dwarsboming van die gereg.
Agliotti het gister getuig hy het in dié verklaring “feite weergegee wat nie 100% korrek is nie”. “Ek het bloot vir hulle (die NIA) gegee wat ek gedink het hulle wou hoor.”
“Was dit om te verseker hulle onderhandel met u, dus om u te bevoordeel?” het Cilliers gevra.
Agliotti het dit erken.
Hy is op 16 November 2006 weens die moord op die mynmagnaat Brett Kebble in hegtenis geneem en byna ’n maand lank aangehou.
Hy het gister toegegee hy het die Nasionale Vervolgingsgesag (NVG) ook in ’n verklaring in Desember 2006 “mislei” omdat hy enigiets sou doen om vrygelaat te word.
Cilliers wou by Agliotti weet: “Is daar enige omstandigheid waarin u dan nié sal lieg nie?”
Agliotti het geantwoord: “Daar is gevalle...maar ja, ek lieg. Ek is seker daar is gevalle waarin ek sal lieg selfs al is dit nie tot my voordeel nie. Ja, ek lieg van tyd tot tyd, soos ek seker is ons almal maar doen.”
Cilliers: “Soos u nou daar sit, sê u dat u die beskuldigde nooit omgekoop het nie?”
Agliotti: “Ja. Ek staan daarby.”
Cilliers: “Trek u aantygings terug dat u vir hom geld of geskenke gegee het?”
Agliotti: “Nee, dit sê ek nie. Maar ek het nooit vir enige gunste gevra nie en hy het nooit gunste vir my gedoen nie.”
Vroeër is getuig Agliotti het Selebi sowat $30 000 (sowat R220 000) gegee om te help met die moontlikheid om ’n lasbrief vir die inhegtenisname van mnr. Billy Rautenbach, destyds voortvlugtige voormalige grootbaas van Hyundai in Suid-Afrika, te skrap.
Cilliers: “So nou ontken u dat u die beskuldigde gevra het om mnr. Billy Rautenbach se lasbrief terug te trek?”
Agliotti: “Behalwe dit en ook dat (’n sekere maatskappy) op die kortlys vir ’n regeringskontrak geplaas moet word, het ek hom geen gunste gevra nie.”
Cilliers: “En in albei gevalle het hy niks gedoen om u te help nie?”
Agliotti: “Dis reg.”
Cilliers: “Ons weet in dié stadium nou goed wat u houding teenoor die waarheid is. Die waarheid speel geen rol nie.”
Agliotti: “Reg.”
Agliotti het daarna gesê hy het goed geweet die NVG was agter Selebi aan en dat hy (Agliotti) hul enkele hoofgetuie was. Hy het voorts geweet dit is hoekom hy ’n pleitooreenkoms gekry het toe hy skuld op aanklag van dwelmhandel in ’n internasionale dwelmsmokkelsaak van R250 miljoen beken het.
Weens die opgeskorte tronkstraf wat streeklanddros James van Wyk hom opgelê het, het Agliotti destyds as ’n vry man uit die hof gestap.
“U het dus geweet u hou die sleutel tot die suksesvolle vervolging van Selebi. En u het dit gebruik om ’n geweldig gunstige ooreenkoms met die NVG te beklink,” het Cilliers gesê.
“Ja,” het Agliotti geantwoord.
- Beeld