Afwagting oor Zuma se tweede staatsrede
2010-02-10 09:42
Liesl Peyper
Kaapstad - Met alle oë môreaand op pres. Jacob Zuma vir sy tweede staatsrede, is daar gister druk in politieke kringe bespiegel oor of Zuma die geleentheid gaan gebruik om die nasie persoonlik om verskoning te vra oor die herrie wat sy bedsake weer veroorsaak het.
Amptelike woordvoerders het egter ’n digte kleed van geheimhouding oor die toespraak getrek, en wou niks verklap nie.
Prof. André Duvenhage, politieke ontleder aan die Noordwes-universiteit, het na aanleiding van die bohaai wat woed oor Zuma se buite-egtelike kind, gesê die president sal bes moontlik die regering se verbintenis tot die teenvigsveldtog beklemtoon. Dit sal hom ook die geleentheid gee om persoonlik verskoning te vra vir sy gedrag en die skade wat dit die regering se teenvigsbeleid kon berokken.
Oudpres. Nelson Mandela sal môreaand in die parlementêre galery sit wanneer Zuma sy staatsrede lewer.
Vanjaar se parlementsopening en staatsrede word vir die eerste keer in die geskiedenis op ’n Donderdagaand gehou sodat dit saamval met die dag waarop Mandela 20 jaar gelede uit die tronk vrygelaat is.
Zuma sal na verwagting ’n groot deel van sy toespraak wy aan die viering van Mandela se vrylating en wat hy vir versoening in die land beteken het. Daar is ook ’n ander rede vir die Mandela-tema, sê Duvenhage.
“Dit is opmerklik hoe die ANC – veral in krisistye soos tans – hom beroep op die simboliek van Mandela.”
Die binnegevegte in die regerende party en debatte tussen voorstanders van ’n sosiaal-demokratiese ideologie en nasionalisme is simptomaties van die politieke onstabiliteit wat tans heers.
Wat die inhoud van die toespraak betref, meen Duvenhage Zuma sal die ANC se verkiesingsbeloftes, soos die regering se verbintenis tot misdaadbestryding, die uitwissing van armoede, werkskepping en grondhervorming in sy toespraak herhaal.
“Hy sal die regering se omdraai-strategie om plaaslike regerings reg te ruk, uitlig met die oog op die plaaslike verkiesings volgende jaar.”
* Oudpres. Thabo Mbeki sal nie die staatsrede bywoon nie omdat hy in die buiteland is, maar oudpres. F.W. de Klerk sal wel teenwoordig wees.
- Die Burger