Afrikaner-boere gesmeek om te bly
2009-10-09 06:26
Sarel van der Walt
Johannesburg - Afrikaner-boere moenie die land verlaat nie.
Die land het hulle nodig, het Tozi Gwanya, direkteur-generaal van landelike ontwikkeling en grondhervorming, gister op Agri SA se kongres in Mulderdrift aan die Wes-Rand gesê.
Hy het gesê sy departement het berigte gelees dat ’n groep Afrikaner-boere deur die Demokratiese Republiek van die Kongo (DRK) genooi is om daar te gaan boer.
“Ons pleidooi aan Afrikanerboere is dat hulle hier moet bly. Ons het baie by julle te leer,” het Gwanya gesê.
“Julle hoort ook hier, want julle voorvaders is hier begrawe.”
Die inleiding van sy toespraak was in Afrikaans.
Gwanya het ’n groeteboodskap aan die kongres oorgedra in die plek van Gugile Nkwinti, minister van landelike ontwikkeling en grondhervorming, wat inderhaas ’n afspraak met adj.pres. Kgalema Motlanthe in Kaapstad moes nakom.
Met verwysing na grondhervorming het Gwanya gesê al die belanghebbendes – onder wie grondeienaars (boere) – moet in die proses geken word.
Hy het ’n beroep op die georganiseerde landbou gedoen om met voorstelle te kom oor hoe grondverdeling aangepak moet word.
“Ons het mekaar nodig as ons suksesvol wil wees.
“Net soos ’n lekker sny varsgebakte brood botter nodig het, so het ons mekaar nodig om van landelike ontwikkeling en grondhervorming ’n sukses te maak,” het Gwanya verder in Afrikaans gesê.
- Beeld