Afrikaans nog net by 2 universiteite
2010-08-16 08:20
Die Burger
Paarl – Daar is nog net twee universiteite in Suid-Afrika – die Universiteit Stellenbosch (US) en die Potchefstroomkampus van die Noordwes-Universiteit (NWU) – waar Afrikaans beskou word as die primêre medium van onderrig.
Al die moontlike word egter gedoen om gesprekke te voer met die toepaslike ministers sowel as met hierdie en ander universiteite, soos die Universiteit van Pretoria en die Universiteit van die Vrystaat, oor die behoud van Afrikaans as onderrigtaal.
Só het prof. Wannie Carstens, voorsitter van die Afrikaanse Taalraad (ATR) en ook lid van die raad van die US, Vrydagaand gesê by die jaarlikse Marie Luttig-gedenklesing van die historiese Hugenote Gedenkskool in Dal Josafat tussen die Paarl en Wellington.
Volgens Carstens sou die raad van die US die naweek opnuut besin oor die taalbedeling aan die universiteit. Hy het die vertroue uitgespreek dat dit groter duidelikheid oor die pad vorentoe sal bring.
Die fel stryd vroeër vanjaar met die verkiesing van die nuwe US-raadslede is ’n goeie aanduiding van die waarde wat oudstudente van die universiteit heg aan die behoud van Stellenbosch as ’n Afrikaanse universiteit.
Hy het gesê in die proses wat gelei het tot die stigting van die ATR in 2008, is reeds in 2003 gesprekke op informele vlak met universiteite gevoer om die klimaat te vestig vir ’n organisasie soos die ATR. “Ná die totstandkoming van die ATR is reeds by twee geleenthede in 2009 gesprekke met die US gevoer omdat die ATR bekommerd is oor die pad wat dié universiteit met Afrikaans wil loop.
“Telkens is versekerings gegee dat daar nie planne is om Afrikaans aan die US af te skaal nie. Daar is aangedui dat Afrikaans ’n vaste rol aan die US het, maar dat dit met die behoeftes van die sprekers van ander tale, onder meer Engels, gebalanseer moet word.
“’n Mens kry soms die gevoel dat die taaldebat by plekke soos Stellenbosch teen Afrikaans gedraai het.”
Carstens het gesê die plan om ministers te teiken, was nie baie suksesvol nie. “Dit is nie dat daar nie pogings was om die betrokke ministers te gaan spreek nie. Die probleem is dat ’n mens op ’n versoek vir ’n gesprek, nie reaksie van die betrokke ministers se kantore kry nie.”
Volg Nuus24 op Twitter
- Die Burger