Afrigter wil Oscar gou op atletiekbaan sien

2013-02-22 09:27

Pretoria – Ampie Louw, die Paralimpiese atleet Oscar Pistorius se afrigter, het gesê indien die atleet se borgtogaansoek suksesvol is, sal hy hom so gou as moontlik op die atletiekbaan wil sien, berig die eNCA-nuuskanaal.

Louw het aan joernaliste by die Pretoriase landdroshof gesê hy wens hy kon na Pistorius uitreik om hom te troos, maar "ek sal dit later doen".

Hy het gesê hy is hartgebroke om Pistorius in die beskuldigdebank te sien.

"Die ondersteuning wat ons kry is so positief, indien hy borgtog geweier word, sal dit verskriklik wees."

Louw het gesê hoewel Pistorius aan al sy komende wedlope onttrek is, sal dit goed wees vir die atleet om weer te begin oefen.

Pistorius het Vrydagoggend omstreeks 07:30 by die hof aangekom. Sy borgtogaansoek sal om 10:00 hervat word.

Die ster-atleet word daarvan beskuldig dat hy die model Reeva Steenkamp in sy huis in die ooste van Pretoria doodgeskiet het.

– Volg Nuus24 op Twitter