Afriforum stel organiseerder aan vir Limpopo
2012-02-23 15:59
Kaapstad – Die burgerregte-groep AfriForum het 'n organiseerder aangestel vir Limpopo, het die groep in ‘n verklaring bekendgemaak.
Die organisasie het in die laaste jaar amper 50 takke landwyd gestig en “gemeenskappe só in staat gestel om swak dienslewering, korrupsie en ander wandade waaraan munisipaliteite hul skuldig maak, teen te staan,” het Tiaan Esterhuizen, die groep se organiseerder vir Limpopo, gesê.
Hy sê daar kom steeds meer navrae in van gemeenskappe wat hul eie takke in Limpopo wil stig.
“AfriForum alleen kan nie gelyktydig in elke dorp wees om te verseker dat daar nie inbreuk op mense se regte gemaak word nie. Die enigste oplossing is om ons lede te bemagtig en op te lei om in hul dorpe en stede betrokke te raak,” lui die verklaring.
Esterhuizen sê AfriForum se plaaslike strukture kan op die organisasie steun vir regshulp en kry ook onder meer bystand met opleiding, administratiewe sake en kommunikasie.
“Individue het steeds die keuse of hulle slegs op nasionale vlak 'n bydrae wil lewer en of hulle op 'n plaaslike vlak self hul regte gaan beskerm.”
“AfriForum skep die struktuur vir beide en gee aan gemeenskapsleiers die geleentheid om hul plaaslike regering op hul tone te hou,” sê Esterhuizen.
Volg Nuus24 op Twitter
- Nuus24