AfriForum wil self Malema ondersoek
2011-08-26 09:00
Pretoria – Die burgerregte-organisasie AfriForum het sy eie ondersoekeenheid van stapel gestuur om korrupsie en ander misdade te ondersoek.
Kallie Kriel, uitvoerende hoof, en Nantes Kelder, hoof van gemeenskapsveiligheid van AfriForum, het Donderdag ook aangekondig die ondersoekeenheid se eerste saak van belang is die beweerde tenderbedrog van Julius Malema, ANC-jeugleier.
Kelder het voorheen as ’n speurder by die polisie en in die spesiale ondersoekspan van die nasionale direkteur van openbare vervolging en ook by die Regulerende Owerheid vir die Private Sekuriteitsbedryf gewerk. Hy is die hoof van die ondersoekeenheid.
Dit sal veral fokus op gevalle waar korrupsie met belastingbetalersgeld gepleeg word, asook gevalle waar die polisie nie hul ondersoekpligte nakom nie.
Die eenheid sal ook op kontrakbasis gebruik maak van die dienste van ’n wye reeks forensiese spesialiste regoor die land.
Volgens Kelder beplan die eenheid ook om private vervolgings in te stel in sake waar die staat weier om verdagtes te vervolg, al is daar genoegsame bewyse vir vervolging.
“Die vervolgings sal eers oorweeg word as die ondersoek wys dat daar ’n prima facie-saak is.
“Private vervolging is die laaste uitweg, wat slegs gevolg sal word indien die polisie en Nasionale Vervolgingsgesag nie hul verpligtinge nakom nie,” het Kelder gesê.
Kriel het gesê die eenheid is nodig omdat die lede van die publiek AfriForum toenemend begin nader het met inligting oor korrupsie in die regering en klagtes van laksheid en magsmisbruik deur lede van die polisie.
Die eenheid is volgens hom nie gestig om die polisie se rol oor te neem nie, maar eerder om ’n aanvullende rol te speel en saam met die polisie te werk.
Kelder het gesê die bewyse wat sy eenheid in misdaadondersoeke bekom, sal aan die polisie oorhandig word om by te dra tot die suksesvolle vervolging van oortreders.
Volg Nuus24 op Twitter.
- Volksblad