AfriForum takel Motata oor rassisme
2011-05-14 18:08
Johannesburg - Die Regterlike Gedragskomitee (JCC) het Saterdag 'n klag van rassisme teen regter Nkola Motata wat deur AfriForum ingedien is, ondersoek, het die organisasie gesê.
"Geen besluit is vandag geneem nie, maar die JCC het gesê ons sal per brief van die uitkoms in kennis gestel word," het Kallie Kriel, 'n woordvoerder, gesê.
AfriForum het gesê hulle klag is gebasseer op 'n oudio-opname van Motata se kommentaar ná hy in 2007 met sy motor in die muur van 'n huis in Hurlingham, noord van Johannesburg, vasgery het.
Volgens Kriel het Motata in die opname kort ná die ongeluk vir Richard Baird, die eienaar van die huis, gesê, "geen Boer gaan my ondermyn nie. Hierdie was altyd die wit man se land, maar dit is nie meer nie".
Afriforum beweer dat Motata se kommentaar rassisties is.
"Enige regter wat hom skuldig maak aan rassistiese optrede, soos Motata oënskynlik in die oudio-opname gemaak het, het geen reg om 'n regter te wees nie," het Kriel gesê.
"Die oudio-opname is in die hof as bewysstuk aanvaar, en ons glo dat daar, op grond hiervan, 'n prima facie-saak is," het Kriel gesê.
- Volg Nuus24 op Twitter.
- SAPA