AfriForum soek antwoorde oor handboeke

2013-01-11 11:38

Kaapstad – AfriForum wil van skole hoor wat probleme ondervind met die aflewering van 2013 se handboeke, het die burgerregtegroep in ‘n mediaverklaring gesê.

Die aankondiging volg nadat dit bekend geword het dat handboeke teen Donderdag nog nie by alle skole in Limpopo afgelewer is nie.

Die minister van basiese onderwys, Angie Motshekga, het vroeër die week gesê 98% van handboeke is reeds by skole in die binneland afgelewer. Dit kom nadat sy verlede jaar onder hewige kritiek deurgeloop het omdat talle skole in in die provinsie nie hul boeke betyds gekry het nie.

Volgens Alana Bailey, adjunk- uitvoerende hoof van AfriForum, het die minister onderneem dat verlede jaar se handboekkrisis nie weer herhaal sal word nie. 

“Die handboekkrisis het ‘n ingrypende invloed op skole in onder meer Limpopo gehad. Leerders in verskillende grade het ure se noodsaaklike onderrig verloor. Die ware invloed wat dit op die prestasie van leerders gehad het, sal eers gemeet kan word wanneer hulle almal hulle matriekjaar voltooi het,” het Bailey gesê.

“Die 2012-matriekuitslae is dus geen rede tot valse gerustheid dat die tekort aan onderrig suksesvol oorbrug is nie.”

Volg Nuus24 op Twitter

- Nuus24