AfriForum sleep Zim hof toe
2010-01-13 17:43
Johannesburg - Die hooggeregshof in Pretoria het Woensdag toestemming aan AfriForum gegee om namens drie Zimbabwiese boere voort te gaan met 'n regsproses teen die regering van Zimbabwe.
Afriforum eis dat 'n beslissing deur die Suider-Afrikaanse Ontwikkelingsgemeenskap (SAOG) aangaande grondeise in Zimbabwe afdwing word.
Die SAOG het in November 2008 beslis dat die grondhervormingsproses van pres. Robert Mugabe onwettig en rassisties is.
Die organisasie het gelas dat vergoeding aan boere betaal moet word wat reeds onteien is, asook dat boere wat nog op hulle plase is, met rus gelaat moet word.
Sedert die bevinding het plaasbesetters egter met hulle aksies voortgegaan, het Afriforum Woensdag in 'n verklaring gesê.
Een boer, Michael Campbell, is wreed aangerand en van sy plaas verdryf.
'n Ander, Louis Fick, is ook van sy plaas verdryf en staar strafregtelike vervolging in die gesig omdat hy nie dadelik gehoor gegee het aan kennisgewings om sy grond te verlaat nie.
AfriForum sê ook die Zimbabwiese regering het sy grondgrypprogram intussen verskerp.
Die Zimbabwiese regeringswoordvoerder, Temba Mliswa, het die afgelope naweek in die Zimbabwiese Sunday Mail aangedui dat sy regering daartoe verbind is om alle wit boere uit Zimbabwe te sit.
Volgens AfriForum se prokureur, Willie Spies, lyk dit of die Zimbabwiese regering sy veldtog teen wit boere en Suid-Afrikaanse burgers in die land verskerp het ná die ondertekening van 'n ooreenkoms vir die bevordering en beskerming van wedersydse beleggings (BIPPA) wat in November tussen Suid-Afrika en Zimbabwe onderteken is.
AfriForum moet op 23 Februarie 2010 weer in die hooggeregshof verskyn met die aansoek om die registrasie en afdwinging van die SAOG-tribunaal se bevindinge in Suid-Afrika.
- Nuus24