Afgedankte Manyi wil glo terugkom
2010-11-07 14:15
Rapport
Gerugte loop dik in die departement van arbeid dat Jimmy Manyi, die afgedankte direkteur-generaal, sy werk wil terughê.
Manyi, wat ook voorsitter is van die Black Management Forum (BMF), is bekend om sy voorkeur vir die behoud van rasgebaseerde regstellende aksie. Hy is vroeër vanjaar geskors deur Membathisi Mdladlana, minister van arbeid, nadat die Noorse ambassadeur in Suid-Afrika ernstige klagtes oor sy gedrag by die Suid-Afrikaanse regering ingedien het.
Luidens ’n berig in koerante van die Independent-groep het die departement van arbeid bevestig Mdladlana het Manyi verlede week afgedank.
Dit het geblyk een van Mdladlana se laaste handelinge as ’n minister te wees; hy is verlede Sondag uit sy amp onthef.
Mdladlana, ’n sterk ondersteuner van oudpres. Thabo Mbeki in die vroeëre magstryd tussen Zuma en Mbeki, is vervang deur Mildred Oliphant.
Die DA het onmiddellik in sy reaksie op Mdladlana se afdanking by monde van Ian Ollis gesê hy hoop nie die ware rede vir die afdanking is om die weg vir Manyi se terugkeer te baan nie.
Nou word in arbeidskringe gesê dis nie die laaste sien van die blikkantien nie.
Manyi het sterk bande met die rasnasionalistiese deel van die ANC, en is na aan die nuut aangestelde minister van sport en ontspanning.
Fikile Mbalula was Julius Malema se voorganger in die ANC-jeugliga en daar word verwag dat hy Gwede Mantashe in 2012 sal uitdaag om hom as sekretaris-generaal van die ANC te vervang.
Gerugte is dat hy die ANC-poging sal moet organiseer om Kaapstad van die DA af te neem in die plaaslike verkiesing in 2011.
- Rapport