Afgedankte Amplats-werkers kom byeen
2012-10-06 11:22
Rustenburg – Sommige van die 12 000 mynwerkers wat deur die wêreld se grootste platinumprodusent afgedank is, het Saterdag byeengekom om protes aan te teken teen hulle afdanking.
Ongeveer 100 mynwerkers het by 'n stadion in Rustenburg byeengekom om hulle reaksie te beplan ná 12 000 werkers van Anglo American Platinum (Amplats) Vrydag in die pad gesteek is.
"Ek het gisteraand 'n boodskap ontvang om te sê ek is afgedank weens die onwettige staking," het Mkhari, 23, gesê. Hy het slegs twee maande gelede by die myn begin werk.
"Dis nie reg nie. Ek het baie skuld, 'n kind, huur..." het sy vriend, Mpoti, ook 23, gesê.
Gepantserde voertuie van die polisie het buite die stadion gestaan, terwyl 'n polisiehelikopter ook te sien was.
Intussen is 'n takleier van die National Union of Mineworkers (NUM) Vrydagaand by sy huis in Marikana doodgeskiet, het dié vakbond gesê.
Lesiba Seshoka, 'n woordvoerder, het die aanval 'n "sluipmoord" genoem. Die polisie kon die moord nie onmiddellik bevestig nie.
"Dit volg na die dood van die NUM-takvoorsitter verlede naweek en die aanval op 'n ander takleier, wat ontsnap het terwyl sy vrou vermoor is," het Seshoka gesê.
Die man wat vermoor is, was die NUM-taksekretaris by Western Platinum.
Vyf NUM-lede is al dood in geweld wat verband hou met 'n staking by Lonmin se platinummyn in Marikana tussen 10 en 16 Augustus.
– Volg Nuus24 op Twitter.
- AFP
