Advertensie oor dronkry maak opslae
2010-12-19 11:12
Johannesburg - Menseregtegroepe en vigs-aktiviste is ontsteld oor ’n drankvervaardiger
se advertensieveldtog teen dronkbestuur omdat hulle meen alle
gevangenes word daarin as verkragters uitgebeeld.
Die groepe dreig nou om ’n klag by die gesagsliggaam vir
reklamestandaarde (GRS) in te dien oor Brandhouse Beverage se
advertensieveldtog.
Dit kom nadat die regering in die afgelope week gedreig het om
alle drankreklame te verbied in ’n poging om dronkbestuur te beveg.
Die Brandhouse-advertensie beeld 15 gevangenes in ’n tronksel uit
met die boodskap: “Hulle wil jou baie graag ontmoet. Moet nooit dronk
bestuur nie.”
“Die advertensie is in swak smaak en uiters onverantwoordelik,” sê Deena Bosch van die vigsaktivistegroep Treatment Action Campaign
(TAC).
“Dit wek die indruk dat alle gevangenes verkragters is en dat mense
wat in die tronk beland geen regte het nie. Die onderliggende boodskap
is dat gevangenes verdien wat na hul kant toe kom,” sê sy.
Bernadette Muthien van Engender, ’n Wes-Kaapse organisasie wat
hom beywer vir die bemagtiging van gemeenskappe en oor geslagskwessies,
stem saam.
“Al die stereotipes word in die advertensies uitgebeeld en dit spreek glad nie tot vroue wat ook dronk bestuur nie.”
Verkragting in tronke is ’n baie ernstige probleem, sê Dean Peacock van die Sonke Gender Justice-menseregtegroep.
“Dit is daarom uiters onverantwoordelik om dit lighartig en as
skoktaktiek in ’n advertensie te gebruik. Dit is onaanvaarbaar,” sê hy.
Brandhouse sê in ’n verklaring die advertensie is ’n poging om
mense te waarsku teen die moontlike gevolge van dronkbestuur - jy kan
tronk toe gaan.
Volgens Brandhouse is op die tronk-advertensie besluit nadat 88%
van 1500 mense wat aan ’n News24-peiling deelgeneem het, gesê het hul
vrees vir tronkstraf moedig hulle aan om nie te drink en te bestuur
nie.
Intussen het dr. Aaron Motsoaledi, minister van gesondheid, en Bathabile Dlamini, minister van maatskaplike ontwikkeling, Woensdag
aangekondig dat die regering drastiese nuwe wetgewing vir volgende jaar
beplan om alkoholmisbruik te probeer hokslaan.
Dit sluit in:
* Motorbestuurders kan verbied word om enige alkohol te gebruik
voordat hulle bestuur. Dit sal dan onwettig wees om met enige alkohol
in jou bloed te bestuur.
* Drankadvertensies kan dieselfde pad loop as sigaretadvertensies -
dus, ’n verbod op alle drankadvertensies en drankbemarkingsveldtogte.
Dit sluit in sport- en ander borgskappe.
* ’n Moratorium op enige nuwe dranklisensies. Geen nuwe kroeë sal
dan oopgemaak kan word nie en nuwe restaurante sal geen alkohol mag
bedien nie.
Brandhouse en SAB sê hulle sal die regering se pogings teenstaan
om drankadvertensies te verbied. Hulle sal aanhou om verantwoordelike
drankgebruik te bevorder.
- Rapport