Advertensie-inkomste droog op vir Oscar

2013-02-19 09:09

Johannesburg – Nike het Maandag gesê hy het geen planne om die Olimpiese atleet Oscar Pistorius in enige toekomstige advertensies te gebruik nie.

Dít volg nadat die sportster van moord aangekla is nadat hy na bewering sy vriendin, Reeva Steenkamp, verlede week in sy huis in die ooste van Pretoria doodgeskiet het.

KeJuan Wilkins, woordvoerder van Nike Inc., het die maatskappy se planne aan die nuusagentskap AP bevestig. Hy wou egter nie sê of Nike planne gehad het vir Pistorius nie en ook nie of die maatskappy huidige advertensies waarin hy te sien is, gaan onttrek nie.

'n Nike-advertensie met die woorde: "I am the bullet in the chamber" is reeds onttrek.

Peet van Zyl, Pistorius se agent, het kort ná sy besoek aan Pistorius by die Brooklyn-polisiekantoor gesê "baie aanhangers" het hul goeie wense aan die ster-atleet gestuur. Van Zyl het gesê aanhangers van oor die wêreld heen het boodskappe gestuur.

Van Zyl het Pistorius besoek om sy atletiekloopbaan te bespreek en wou nie kommentaar lewer oor die geestes- en emosionele toestand van die 26-jarige atleet nie.

Hy het ook gesê geen borge het nog onttrek nie.

Al Pistorius se toekomstige wedlope is intussen gekanselleer.
     
– Volg Nuus24 op Twitter

- Sapa - AP