Adv. Barbie wil buite bydrae lewer
2012-02-20 07:05
Pretoria – Cézanne Visser, oftewel advokaat Barbie, glo sy sal buite die tronk ’n baie beter bydrae tot die samelewing kan maak.
“Sy wil baie graag weer ’n positiewe bydrae tot die samelewing kan maak, eerder as om die belastingbetaler te bly geld kos,” het dr. Llewellyn Curlewis, Visser se regsverteenwoordiger, Sondag gesê.
Dít kom nadat Curlewis bekend gemaak het die nasionale kommissaris van korrektiewe dienste (DKD), Tom Moyane, het ’n aansoek ingedien om die res van Visser (34) se gevangenisstraf in korrektiewe toesig omgeskakel te kry.
Dít beteken Visser kan binnekort vrygelaat word om die res van haar vonnis in huisarres uit te dien.
“Sy is versigtig optimisties oor die nuus. Sy hoop dat dit sal gebeur, maar plaas nie al haar hoop daarop nie, omdat dit naïef sal wees,” het Curlewis gesê.
Curlewis het voorts gesê hy en Visser gaan nou alles in hul vermoë doen om die aansoek te ondersteun.
Visser het reeds bykans twee jaar van haar tronkstraf van sewe jaar weens onder meer die onsedelike aanranding van jong meisies uitgedien.
Curlewis het gesê verskeie redes, insluitend waarskynlik die huidige oorbevolking van die land se tronke, sou ’n rol gespeel het in die besluit om Visser as ’n kandidaat vir vonnisomskakeling te oorweeg.
“Haar goeie gedrag in die tronk sou beslis ook ’n baie groot rol gespeel het. Sy is volledig gerehabiliteer en was tot dusver sonder twyfel ’n modelgevangene,” het hy gesê.
Visser het verlede jaar ’n groot rol gespeel om ’n modeparade en ’n Mej. Valentyns-kompetisie vir die vroue in die Pretoriase vrouegevangenis te reël.
Haar ma, Susan Lemmer, was by dié kompetisie ’n beoordelaar.
Lemmer kon nie Sondag vir kommentaar bereik word nie.
Curlewis het gesê dit kan enigiets van ’n maand tot twee jaar neem vir die DKD om te besluit of Visser wél op korrektiewe toesig vrygelaat moet word.
“Hulle sal nou moet vasstel of sy ’n permanente adres, vaste werk en genoegsame ondersteuning sal hê as sy vrygelaat sou word en daar sal natuurlik insette gekry word van haar slagoffers en hul ouers ook,” het Curlewis gesê.
“Al daardie prosesse gaan nou eers begin. Tot dusver is ons slegs in kennis gestel dat sy as ’n kandidaat oorweeg word.
“Ons gaan alles doen om te sorg dat die aansoek goedgekeur word.”
Visser is destyds op 11 aanklagte van onder meer die maak van onsedelike voorstelle aan minderjariges om onsedelike dade te pleeg, onsedelike aanranding en die besit en vervaardiging van kinderpornografie skuldig bevind.
Volg Nuus24 op Twitter
- Volksblad
