Adv. Barbie 'was heks op brandstapel'
2011-09-22 08:03
Kaapstad – “Die heks moes verbrand word en die regsberoep het dubbel seker gemaak dat sy nie vrykom van die brandstapel nie.”
Só skryf dr. Johann Lemmer, seksuoloog en gewese stiefpa van Cézanne Visser (oftewel adv. Barbie), in sy boek oor die opsienbarende lewe en verhoor van Visser. Sy dien tans sewe jaar tronkstraf uit op verskeie seksverwante aanklagte.
Dirk Prinsloo, die advokaat saam met wie sy geleef het toe die misdade gepleeg is en wat tans in Belarus tronkstraf uitdien weens ’n bankrooftog, is volgens Lemmer ’n “seksuele sadis” wat “binne ’n paar maande daarin geslaag het om van ’n onskuldige jong meisie sy Barbiepop-slet te maak”.
Sy boek, Advokaat Barbie – Wat regtig gebeur het word Vrydag in Centurion bekend gestel en sal daarna in boekwinkels te koop wees.
Die boek volg op die hakke van Visser se ma, Susan, se boek, Ek wil hê jy moet weet – sy bly my kind.
Lemmer se boek verskil hemelsbreed van sy gewese vrou s’n. In sy boek word eksplisiet oor Prinsloo se seksuele afwykings geskryf. Hoewel geen ouderdomperk op die boek geplaas is nie, bevat dit tog ’n geweld-en-seks-waarskuwing.
Lemmer het Woensdag gesê sy boek is nie “’n verhaal nie, maar eerder ’n dokumentêre vertelling” oor Visser en Prinsloo se verhouding en van die opsienbarende verhoor. Hy was van meet af aan as seksuoloog by die verhoor betrokke.
Hy sê onder meer dat wat in Prinsloo se huis gebeur het, nie “eens naastenby kinky seks” was nie, maar die dade van ’n “gevaarlike seksuele sadis”.
“Prinsloo se seksuele wellus het nie net by ‘normale’ gemeenskap gebly nie. Dit was meestal kragdadig, vinnig, pynlik en emosieloos.”
– Volg Nuus24 op Twitter
- Die Burger
