'Adv. Barbie toon berou'

2010-02-08 14:13

Pretoria – Cézanne Visser, ook bekend as advokaat Barbie, het berou getoon vir die seks-verwante dade waaraan sy skuldig bevind is, het die forensiese kriminoloog Ian Sonnekus Maandag aan die hooggeregshof in Pretoria gesê.

Sonnekus het aan die hof gesê dat Visser haarself gedurende die verhoor “beoordeel” het.

Na verskeie konsultasies met Visser nadat sy in Oktober skuldig bevind  is, het Visser glo aan Sonnekus gesê dat sy nie meer vatbaar is vir manlike manipulasie nie.

Gedurende die verhoor het die verdediging geargumenteer dat Visser die seksuele dade aan minderjariges gepleeg het omdat sy onder die invloed van Dirk Prinsloo, haar gewese kêrel, was.

Met verwysing na die onsedelike dade en die pyn wat die slagoffers moes deurmaak, het Sonnekus gesê dat Visser jammer voel oor die situasie.

“As dit my eie kind was sou dit onaanvaarbaar gewees het. Dit moes erg vir haar gewees het. Sy het dit nie verwag nie en sy kon dit as traumaties ervaar het,” het Visser aan hom gesê.

“Sy toon regtig berou en sy het baie wysheid hieruit gekry,” het hy getuig.

Daar is aan die hof gevra om in ag te neem dat sy ‘n eerste oortreder is en geen vorige skuldigbevindings het nie, wanneer haar vonnis opgelê word.

- Sapa