Adv. Barbie 'ten volle gerehabiliteer'

2013-02-22 08:20

Pretoria – Cézanne Visser, beter bekend as adv. Barbie, het haarself in die Pretoriase vrouegevangenis ontdek, al is daar wéér bevind sy is nog nie gerehabiliteer nie, berig Beeld.

“Sy het goed aangepas, ongelooflike verhoudings in die tronk opgebou en haar lewenservaring onherroeplik verbreed.

“Sy het Christelike vergifnis ervaar, al het sy nog nie die geleentheid gekry om haar slagoffers om vergifnis te vra nie,” het Susan Lemmer, haar ma, Donderdag gesê.

Visser was deel van ’n dansgroep wat opgetree het by die seremoniële opening van die departement van korrektiewe dienste se nasionale sokkertoernooi genaamd Afcon Behind Bars.

Visser het voet by stuk gehou haar dogter is ten volle gerehabiliteer, al het die paroolraad verlede maand haar aansoek om die omskakeling van haar vonnis na korrektiewe toesig vir ’n tweede keer van die hand gewys.

Dié paroolraad het besluit sy is steeds nie gerehabiliteer nie nadat die Pretoriase hooggeregshof in Desember gelas het dat haar aansoek heroorweeg moet word.

Volgens Visser sal haar dogter op 17 Mei reeds drie jaar van haar vonnis van sewe jaar tronkstraf uitgedien hê. Sy het weens ’n presidensiële kwytskelding ses maande afslag op haar vonnis gekry.

– Volg Nuus24 op Twitter