Adv. Barbie kry wéér nie parool

2013-01-30 10:40

Johannesburg – Die openbare uitsaaier het pas berig dat Cezanne Visser, wat as “Advokaat Barbie” bekend staan, nog nie huis toe sal gaan nie.

Ofentse Morwane, woordvoerder vir die departement van korrektiewe dienste, sê die paroolraad het weer haar versoek om haar gevangenisstraf na korrektiewe toesig om te skakel, van die hand gewys.

Die SABC berig Visser het sedert verlede jaar probeer om vrygelaat te word.

Sy dien ‘n tronkstraf van sewe jaar uit nadat sy jong meisies en vroue onsedelik aangerand het.

Visser is ook daaraan skuldig bevind dat sy kinderpornografie besit en vervaardig het.

Die voormalige advokaat het ook die kinderhuis bedrieg, deur voor te gee dat sy en haar voormalige minnaar, Dirk Prinsloo, getroud is om sodoende die kinders die naweek by hulle te laat deurbring.

Waarnemende regter Chris Eksteen het destyds bevind dat Visser 'n aktiewe deelname gehad het in seksuele aktiwiteite by Prinsloo se huis.

Volg Nuus24 op Twitter