Ace moet hieraan aandag gee, sê DA
2011-03-03 09:04
Bloemfontein - Byna ’n derde van die Vrystaat se potensiële werkmag is werkloos, die provinsie se infrastruktuur het dringend aandag nodig en die landelike ekonomieë moet ontwikkel word.
Dít is onder die sake waaraan premier Ace Magashule môre in sy provinsiale rede moet aandag gee, het Roy Jankielsohn, Vrystaatse DA-leier, Woensdag op ’n nuuskonferensie gesê.
Jankielsohn sê byna 287000 mense tussen 15 en 64 jaar is werkloos in die Vrystaat.
“Landelike ekonomieë het erg agteruitgegaan die afgelope dekades. Baie eens welvarende dorpe is deesdae afhanklik van toelaes. Die grootskeepse verval van infrastruktuur dra by tot ekonomiese verval,” het Jankielsohn gesê.
Volgens hom hou 30 uit die 101 Vrystaatse rioolaanlegte ’n groot gevaar vir inwoners in.
“Byna 50 000 huishoudings in die provinsie het steeds emmertoilette. Alhoewel baie huise aan armes oorhandig is sedert 1996, bly die regering, veral plaaslike regerings, in gebreke om dié huise met basiese dienste te voorsien.”
Volgens Jankielsohn is daar genoeg hulpbronne, maar kniehalter swak bestuur munisipaliteite dienslewering. Hy wys daarop dat slegs drie munisipaliteite ongekwalifiseerde ouditverslae ontvang het.
Meer as R550 miljoen se tenders, deur 25 munisipaliteite, is toegeken sonder dat die regte tenderprosedure gevolg is. “Meer as R512 miljoen is bestee, waarvoor nie begroot is nie.”
Jankielsohn sê ’n oorsaak van die provinsiale verval is kader-ontplooiing deur die ANC.
“Behalwe dat dit kan lei tot nepotisme en onbevoegdheid, heers geen stabiliteit in munisipale bestuur nie. Slegs vier munisipale bestuurders in die provinsie is al langer as twee jaar by hul onderskeie munisipaliteite.”
Magashule se provinsiale rede is more om 09:00 op die Vista-kampus van die Universiteit van die Vrystaat.
- Volksblad