'Aanvalle op boere raak almal, ongeag van ras'

2012-08-14 22:59

Johannesburg – Bernard Maree, woordvoerder van die Vrystaatse Landbou-unie, het sy kommer uitgespreek oor die veiligheid van boere en hul gesinne in die Ladybrand-gebied, het RSG berig.

Dit volg nadat 'n Amerikaanse plaasbestuurder in sy plaashuis naby Ladybrand in die Vrystaat aangerand is.

OFM het vroeër berig Allen Rodgers (61) is Maandag omstreeks 17:30 deur twee inbrekers in sy huis ingewag voordat hy vasgebind en herhaaldelik met 'n voorwerp geslaan is. Hy veg om sy lewe in die Mediclinic Bloemfontein.

Martin Xuma, ‘n polisiewoordvoerder, sê die verdagtes het te voet met 'n groot kontantbedrag en twee selfone gevlug. Die polisie is nog op soek na die skuldiges.

Maree sê aanvalle op boere raak almal; ongeag van ras.

Pieter Groenewald, VF+-LP en -woordvoerder, het vroeër in ‘n verklaring gesê die onlangse moord op Ronél van Eyk, ‘n boervrou naby Hartbeesfontein in die Noordwes, is ‘n bewys dat die regering beheer oor misdaad verloor het.

Volg Nuus24 op Twitter