Aansoeke om parool summier gevries
2010-12-28 09:00
Kaapstad - Paroolaansoeke van alle gevangenes wat voor 1994 tot lewenslange tronkstraf gevonnis is, is summier gevries.
Nosiviwe Mapisa-Nqakula, minister van korrektiewe dienste, het die stap in ’n koerantadvertensie aangekondig.
Sy het gesê die verbod sal geld totdat sy duidelikheid kry van die konstitusionele hof oor die rol van die Nasionale Raad op Korrektiewe Dienste.
Die raad doen normaalweg aanbevelings aan die minister van korrektiewe dienste oor parool vir dié kategorie gevangenes.
Die Wet op Korrektiewe Dienste van 1998 beslis dat mense wat tot lewenslange tronkstraf gevonnis is, minstens 20 jaar van hul vonnis moet uitdien voordat hulle om parool kan aansoek doen.
Mapisa-Nqakula meen dubbelsinnigheid het ontstaan nadat die konstitusionele hof in September vanjaar in die guns van Paul van Vuuren beslis het.
Van Vuuren is in 1992 die doodstraf opgelê nadat hy skuldig bevind is aan moord, roof en ander misdrywe. Nadat die doodstraf ongrondwetlik verklaar is, is sy vonnis verander in lewenslange tronkstraf.
Hy het hom in September tot die konstitusionele hof gewend wat gelas het dat hy minstens 10jaar van sy vonnis moes uitdien en dat hy nou vir parool in aanmerking kom.
Dit kom daarop neer dat die 5373 gevangenes wat tussen 1Augustus 1987 en 1 Maart 1994 gevonnis is, nou kwalifiseer vir oorweging om op parool vrygelaat te word nadat hulle minstens 10jaar van hul vonnis uitgedien het.
Die besluit beteken dat Clive Derby-Lewis, wat saam met ’n Poolse immigrant, Janusz Walus, skuldig bevind is aan die moord op die SAKP-leier, hris Hani in 1993, ook nou in aanmerking kom.
Derby-Lewis se aansoek om parool is twee jaar gelede op omstrede wyse van die hand gewys toe familie van Hani en die destydse minister van korrektiewe dienste, Ngconde Balfour, kapsie daarteen gemaak het.
Gangreen is in September vanjaar by Derby-Lewis gevind nadat hy oor die raam van ’n ysterkatel in ’n gang van die tronk geval en sy regterbeen beseer het. Later is velkanker ook by hom gediagnoseer.
Mapisa-Nqakula het gesê na aanleiding van Van Vuuren se hofuitspraak sal ’n oudit gedoen word van alle gevangenes wat voor 1 Oktober 2004 gevonnis is.
"Die uitspraak beteken nie dat elke gevangene wat voor 1 Oktober 2004 tot lewenslange tronkstraf gevonnis is, nou die reg het om op parool of dagparool vrygelaat te word nie."
- Volg Nuus24 op Twitter
- Die Burger