Aansoek onttrek om te myn in wynlande
2010-03-11 10:33
Jean-Marie de Waal, Die Burger
Kaapstad - Die wynlande is vir eers veilig. Die staatsbeheerde mynmaatskappy gaan sy prospekteerreg-aansoeke vir die Bottelary-gebied naby Stellenbosch, asook aan die voet van die Tygerberg, terugtrek.
Dít is volgens die direkteur-generaal (DG) van minerale bronne, adv. Sandile Nogxina. Die mynmaatskappy het volgens die DG eers ná die aansoeke ingedien is vasgestel dié gebiede is onder wingerd.
Dit het groot openbare reaksie ontlok – selfs in die buiteland.
Nogxina het aan Die Burger gesê die aansoeke gaan beslis teruggetrek word na aanleiding van sy gesprekke met die maatskappy. ’n Aansoek waar dit later blyk daar ’n natuurreservaat of ander bedrywe bo op die grond bedryf word, sal nooit toegestaan word nie, het die DG verder gesê.
Die gebied sluit in die Bottelary- heuwels-renosterveld-bewarea, ’n deel van die Jordan-wynlandgoed en die historiese De Grendel-landgoed.
Die staatsbeheerde mynboumaatskappy African Exploration Mining and Finance Corporation sal nie ’n “agterdeur” kan vind nie, het Nogxina verseker.
“Die wetlike prosesse maak dit onwettig vir ons om so ’n aansoek toe te staan.”
Aansoeke hiervoor is ingevolge die Wet op die Ontwikkeling van Minerale en Petroleum-hulpbronne by die departement van minerale en energie ingedien.
Gary Jordan van die Jordan-wynlandgoed se grond is regstreeks geraak deur die aansoek om prospekteerregte in die Bottelary-gebied. Toe Sake24 hom Woensdagmiddag bel om oor die terugtrekking van die aansoeke in te lig, was hy nog onbewus van die besluit.
Hy het gesê die terugtrekking word verwelkom, maar dit is baie jammer daar moes eers ’n landwye herrie oor dié kwessie ontstaan het.
“Ek is besorg daaroor dat die hele land nou senuagtig is,” het hy gesê.
Johan Malan, voorsitter van die Kaapse Wyngilde, het gesê dit is goeie nuus, want die langtermyn-voordele van die wynbedryf is groter as die korttermyn-voordele wat prospekteerdery bring.
–Die Burger