Aansoek om Marikana-ondersoek uit te stel, verwerp
2012-10-01 17:00
Rustenburg – 'n Aansoek om die geregtelike ondersoek oor die skietery by Lonmin se platinum-myn by Marikana in die Noordwes uit te stel, is Maandag verwerp.
Ian Farlam, oudregter, het gesê die ter plaatse inspeksie in Marikana sal Maandagmiddag hervat word.
Dít kom nadat adv. Dumisa Ntsebeza, verteenwoordiger van die 20 families van diegene wat dood is, gevra het dat die kommissie die aangeleentheid vir 14 dae moet uitstel.
George Bizos, 'n menseregte-prokureur, het vroeër aangevoer hy is nie ten gunste van die uitstel nie en gesê dit gaan die kommissie belemmer en sal 'n vermorsing van geld wees.
Ntsebeza het vir 'n uitstel gevra en gesê die slagoffers se families kom van plattelandse omgewings in die Oos-Kaap en hulle het nie geweet die ondersoek begin Maandag nie.
Hy het gesê die families het van die verhoor gehoor toe prokureurs hulle in die Oos-Kaap besoek het.
Ntsebeza het gesê die staat moet die families help sodat hulle na Rustenburg kan reis omdat hulle die verhoor en ter plaatse inspeksie wil bywoon.
Farlam het gesê hy is ingelig die departement van sosiale ontwikkelling is besig om voorbereidings te tref om die families na Rustenburg te bring.
Ntsebeza het ook gesê hy het meer tyd nodig om inligting vanaf die polisie te kry. Hy wil 'n lys met die name van die polisiebeamptes hê wat ten tyde van die skietery aan diens was.
Hy wag steeds op die polisie om die inligting aan hom deur te gee.
Bizos het gesê hy soek ook daardie inligting, maar dit is nie nodig om die saak uit te stel nie.
Intussen het die geregtelike kommissie van ondersoek Maandagmiddag tesame met advokate, ooggetuies en waarnemers by Lonmin se platinum-myn aangekom.
Sommige het onder sambrele gestaan terwyl hulle gewag het vir die ter plaatse inspeksie om te begin.
Inwoners van die nabygeleë informele nedersetting het ook by die toneel saamgedrom.
'n Groep polisiebeamptes was ook teenwoordig.
Altesaam 34 mense is dood en 78 ander is tydens 'n skietery op 16 Augustus gewond toe die polisie probeer het om stakers by Lonmin uiteen te jaag.
Tien ander mense is die vorige week in gewelddadige betogings dood.
– Volg Nuus24 op Twitter.
- SAPA
