AWB se tv-fiasko: Debat was regverdig, sê UKKSA
2010-06-02 15:00
Kaapstad – Die Uitsaaiklagtekommissie van Suid-Afrika (UKKSA) het beslis dat die berugte debat tydens AWB-leier Andre Visagie se onderhoud met e-tv regverdig was.
Die debat is kort na voormalige AWB-leier, Eugene Terre'Blanche se moord, uitgesaai.
Visagie het uit die ateljee gestorm nadat die politieke analis Lebogang Pheko, wat ook deelgeneem het aan die debat, hom herhaaldelik in die rede geval het.
Voor hy die ateljee verlaat het, het die AWB-leier Pheko gedreig.
Die kommissie het klagtes van die publiek dat e-tv nie regverdig teenoor die AWB-leier opgetree het nie, verwerp.
“E-tv het moeilikheid gesoek het deur ‘n debat van so ‘n aard kort na die moord op Eugene Terre'Blanche te reël,” het komm. Henning Viljoen in sy uitspraak gesê, "en moeilikheid sou kom."
Visagie het hom ook vasgeloop teen die aanbieder, Chris Maroleng, waarna Maroleng “don’t touch me on my studio” gesê het.
Die frase het sedertdien 'n bekende uitdrukking geword.
Viljoen het bevind dat e-tv nié die gedragskode vir uitsaaiers, wat bepaal dat alle partye regverdiglik verteenwoordig moet word, gebreek het nie.
“Ten spyte van die onderbrekings, die vurige debat en die fiasko aan die einde, is albei partye die geleentheid gebied om hul saak te stel,” het Viljoen gesê.
Volg Nuus24 op Twitter
- SAPA