AWB reageer met woede ná plofstof-sage
2010-05-08 12:28
Cathy Dlodlo
Kaapstad - Die AWB het met woede gereageer op die berigte dat ’n groep verregses in Pretoria in hegtenis geneem is wat glo plofstof in townships wou plant.
Luidens die berigte het die polisie die groep ’n week ná die moord op die AWB-leier, Eugene Terre’Blanche, vasgetrek.
André Visagie, sekretaris-generaal van die AWB, sê sy organisasie is ontevrede omdat daar op ’n verband tussen sy beweging en die verregse groep gesinspeel word omdat die voorval ná Terre’Blanche se moord plaasgevind het.
“As daar ’n misdaad gepleeg word, soos die onwettige besit van plofstof, word die AWB se naam daarby betrek.
“Dit terwyl ons mening nie gevra word nie.”
Visagie sê daar is ook nie seker gemaak of die vermeende misdadigers lede van die AWB is nie.
Hy sê hy wil dit duidelik stel dat dié vermeende misdadigers nie lede van die AWB is nie.
“Verlede week is daar swart mense in hegtenis geneem in verband met die onwettige besit van plofstof waarmee hulle glo ’n kitsbank wou opblaas.
“Die AWB is tóé nie daarby betrek nie. Maar noudat wit mense in hegtenis geneem is, word die AWB se naam bygesleep.”
Visagie het die media daarvan beskuldig dat hy “konstant volhou om die persepsie by die publiek te skep dat die AWB ’n klomp misdadigers is”.
- Volksblad