'ASA wou Chuene vernietig'
2009-11-06 09:19
Johannesburg - Suid-Afrika se Sportkonfederasie en Olimpiese Komitee (Sascoc) het Atletiek Suid-Afrika (ASA) se president, Leonard Chuene, geskors omdat hulle sy pogings tot transformasie wou verhoed, het ‘n ASA raadslid Vrydag gesê.
“Hulle wil Chuene se kop hê. Hulle wil Chuene vernietig,” het die raadslid, Simon Dlamini, in ‘n onderhoud op SAfm gesê.
“Chuene veg vir transformasie binne Sascoc self. Dit is die rede waarom Chuene so gehaat word. Dit is hoekom ons by hom gestaan het.”
Die Olimpiese bestuursraad het Donderdag in ‘n verklaring gesê Chuene is geskors hangende die uitslag van ‘n ondersoek oor die hantering van die goue medaljewenner, Caster Semenya, se geslagstoetse deur die ASA.
Sascoc se hoof- uitvoerende beampte, Tubby Reddy, het aan Safm gesê dat die liggaam wetlik opgetree het in die besluit om Chuene te skors.
“As jy na die sportwet kyk, laat dit toe dat die land se sportfederasie sulke ondersoeke loods.”
Daar was verskeie redes vir Chuene se skorsing, het hy gesê, insluitende die feit dat hy ‘n dokter se raad om Semenya uit die wêreldkampioenskappe te onttrek, geïgnoreer het.
“Sy aksies was baie onverantwoordelik,” het Reddy gesê en bygevoeg dat Chuene “skade” aan Semenya aangerig het.
Hy het gesê dat ‘n ondersoek sal toon watse strafregtelike stappe teen Chuene geneem moet word.
“Daar is verskillende strawwe wat uitgevoer kan word. Een van hulle kan permanente skorsing wees.”
- Sapa