ANCYL swyg oor Valke-ondersoek
2011-08-21 10:15
Johannesburg – Die ANC-jeugliga het Sondag geweier om kommentaar te lewer oor die Valke se ondersoek na sy leier, Julius Malema, se finansiële sake.
Die Valke het Saterdagaand bevestig dat bewerings van korrupsie en bedrog teen Malema ondersoek word.
Dít volg nadat die burgerregte-organisasie AfriForum in Julie 'n klag teen Malema ingedien het.
AfriForum het die korrupsie-klag teen die jeugleier ingedien ná berigte dat hy 'n trustfonds geskep het waarin sakelui en politici geld betaal sodat Malema sy invloed moet gebruik om tenders aan hulle toe te ken.
Kol. McIntosh Polela, Valke-woordvoerder, kon nie veel oor die ondersoek uitbrei nie.
"Dit is die eerste keer dat ons kan bevestig dat ons 'n ondersoek doen, maar ons kan nie meer besonderhede gee nie."
Dié ondersoek kom 'n dag nadat die ANC aangekondig het dat Malema dissiplinêr verhoor sal word omdat hy verdeelheid in die ANC saai en die party in oneer bring.
– Lees meer hier
– Volg Nuus24 op Twitter