ANCYL ontsteld oor IMF-bydrae
2012-06-20 23:03
Johannesburg – Die ANC-Jeugliga is geskok deur die regering se gereedheid om $2 miljard (sowat R16,58 miljard) aan die Internasionale Monetêre Fonds te leen.
“Dit word in die sterkste terme verwerp weens die realiteit dat terwyl ons jeugmaand in Suid-Afrika vier, miljoene jong mense werkloos is en deur erge armoede en ekonomiese ongelykheid in die gesig gestaar word,” het die liga Woensdag in ‘n verklaring gesê.
Die Tesourie het Dinsdag gesê die geld word gegee in terme van ‘n IMF-“brandmuur” wat bedoel is om toekomstige finansiële krisisse te verhoed. President Jacob Zuma het dié onderneming by die G20-spitsberaad, ‘n vergadering van die wêreld se grootste ekonomieë in Los Cabos, Mexiko, gemaak.
“As die IMF die fondse gebruik, word die geld aan die IMF geleen en dit is nie ‘n skenking nie... in hierdie tyd sal die geld rente trek vir Suid-Afrika,” het Zuma se woordvoerder, Mac Maharaj, Dinsdag gesê.
“Die kapitaal van die lening sal uiteindelik terugbetaal word aan Suid-Afrika. Dit is soos om geld aan ‘n baie sterk bank te leen. Hierdie lening is nie ‘n risiko nie.”
Die ANCYL het die skuif veroordeel en gesê die IMF het nog geen noemenswaardige bydraes gemaak tot die verbetering van die lewens van Suid-Afrikaners nie.
“Die IMF weier hervorming, is toegewyd aan imperialisme en hou aan om ‘n ou wag te beskerm wat weerstand teen verandering volhou.”
Dit sou meer gepas wees om die geld vir opvoeding te gebruik en om werke te skep vir jong Suid-Afrikaners. Die liga het gesê die Suid-Afrikaanse regering se benadering tot internasionale kwessies moet nie ten koste van sy eie mense wees nie.
- Volg Nuus24 op Twitter
- SAPA
