ANCYL mobiliseer steun vir Malema, Shivambu
2011-08-28 14:53
Johannesburg – Lede van die ANC-jeugliga regoor die land word gemobiliseer om hul steun aan Julius Malema en Floyd Shivambu te toon, het die jeugliga Sondag gesê.
"Die nasionale uitvoerende komitee (NUK) en die provinsiale uitvoerende komitee (PUK) gaan ons leierskap ondersteun en ons wil ons strukture daarvan in kennis stel," het Ayanda Kasa Ntsobi, sekretaris van die Gautengse ANC-jeugliga, gesê.
Sy het gesê lede van die ANCYL is gevra om ter ondersteuning van Malema en Shivambu buite Luthuli-huis in Johannesburg te vergader.
"Ons wil hê ons lede moet weet dat dit 'n vreedsame optog is en nie teen die ANC nie."
Meer as 350 verteenwoordigers van takke in Gauteng het Sondag in Braamfontein vergader oor die aanklagte wat teen Malema en Shivambu gebring is.
Soortgelyke vergaderings is in verskillende provinsies regoor die land gehou.
Malema en Shivambu word daarvan aangekla dat hulle die party in oneer bring oor hul openlike steun aan opposisiepartye in Botswana vir regeringsverandering in die land. Malema is ook daarvan aangekla dat hy verdeeldheid in ANC saai.
Malema het Vrydag gesê hy is gereed vir die dissiplinêre verhoor.
"Wat ookal met ons gebeur, ons is reg daarvoor. Ons bloed sal swart, groen en goud bly al word ons môre afgedank."
Malema en Shivambu sal Dinsdag en Woensdag voor die ANC se tugkomitee verskyn.
– Volg Nuus24 op Twitter
- SAPA