ANCYL sing weer ‘Skiet die Boer’
2011-06-16 11:15
Midrand – Afgevaardigdes by die ANC-jeugliga (ANCYL) se nasionale konferensie het Donderdag weer die lied met die woorde “dubula ibhunu” (skiet die boer) gesing.
Bywoners by die beraad het ook ander liedere gesing, almal ter ondersteuning van ‘n hernude termyn vir jeugleier Julius Malema.
Sommige van die liede wat by die konferensie te Gallagher Estate in Midrand gesing is, was ou ANC-liedere, met hul woorde aangepas om ondersteuning vir Malema te toon.
"Sifuna Ujuju manje" (ons wil vir Juju nou hê ) en "uMalema ungowethu" (Malema is ons leier) is van die liede wat deur die meerderheid afgevaardigdes gesing is.
Juju is die jeugligaleier se bynaam.
Malema se toekoms as ANCYL-leier word uitgedaag deur Lebogang Maile, die beweging se provinsiale voorsitter in Gauteng.
Hy is egter die agteros in die stadium, met geen provinsie wat sy poging om die posisie by Malema oor te neem ondersteun nie.
Maile se enigste kans om wel vir die posisie in aanmerking te kom sou wees as ‘n afgevaardigde hom op die dag van die vloer af nomineer.
Hy sou dan ook ondersteuning van 30% van die 5 500 afgevaardigdes by die konferensie moes inwin.
Volg Nuus24 op Twitter.
- SAPA