ANCYL dreig weer oor Nedbank
2009-10-03 11:50
Nedbank moet sy ASA-borgskap herinstel, of die gramskap van patriotiese Suid-Afrikaners verwag, het die ANC-jeugliga (ANCYL) Saterdag gesê.
"[Die] ANCYL doen ‘n beroep op Nedbank om sy borgskap van Atletiek Suid-Afrika (ASA) weer in te stel, of die mag van patriotiese Suid-Afrikaners te ervaar," het die ANCYL-woordvoerder Floyd Shivambu in ‘n verklaring gesê.
"Die ANCYL sal patriotiese Suid-Afrikaners, maatskappye, instansies en regeringsdepartemente wat met Nedbank sake doen aansê om hul rekeninge by die bank weg te neem en na ander banke oor te plaas as die borgskap nie weer ingestel word nie.
"Ons wil dit in die openbaar sê dat hierdie nie ‘n bedreiging is nie, maar ‘n belofte," het Shivambu gesê.
Volgens Shivambu is die voorgestelde optrede daarop gemik om te verseker dat banke hulle “verantwoordelikheid” nakom om te belê in die ontwikkeling van atletiek in die land.
Shivambu het egter aangedui dat die ANCYL bereid is om met Nedbank “in gesprek te tree” oor sportborgskappe.
"Die ANCYL is egter bereid om met die leierskap van Nedbank in gesprek te tree om ‘n gemeenskaplike begrip te ontwikkel vir die befondsing van sport; veral die ontwikkeling van atletiek in Suid-Afrika kan nie ondermyn word as gevolg van klein foutjies nie."
Hy het gesê dat die onttrekking van Nedbank se borgskap op die oog af daarop gemik is om ASA te “ondermyn” en om “die ontwikkeling van atletiek in die land terug te draai”.
Saterdag se verklaring kom nadat die ANCYL-leier Julius Malema vroeër gedreig het om “die samelewing te mobiliseer” teen Nedbank.
- Nuus24