ANCYL: Mantashe is teenstrydig
2012-01-19 17:55
Johannesburg – Die ANC se sekretaris-generaal, Gwede Mantashe, word beskuldig van teenstrydigheid nadat hy leiers wat in die openbaar kommentaar oor die ANC-jeugliga se dissiplinêre sake gelewer het, tereggewys het.
Die ANCYL het aan Mantashe geskryf om te kla oor dié teregwysing, het The Star berig.
Die party het in die brief aangevoer dat leiers, insluitende Mantashe en president Jacob Zuma, by verskeie geleenthede gepraat het oor kwessies wat verband hou met die dissiplinêre proses en dissipline in die ANC.
Hulle is nog nooit tot orde geroep deur die gesamentlike leierskap nie, het die ANCYL gesê.
“Ons dink dit is teenstrydig van die ANC-leierskap om sommige beleide en waardes op sekere leiers toe te pas, terwyl dit nie by ander leiers toegepas word nie,” het die ANCYL glo in die brief geskryf.
Dinsdag, ‘n dag ná ‘n nasionale uitvoerende komiteevergadering, het Mantashe in ‘n verklaring gesê dat dit “korrek” is vir partyleiers om “uit die proses te bly” rakende die saak teen die voormalige president van die ANCYL Julius Malema.
Hy het gesê dit kan geïnterpreteer word dat hulle die uitkoms van verrigtinge probeer beïnvloed.
Mantashe het aan The Star gesê dat die verskil tussen die ANC se tesourier-generaal, Mathews Posa, se kommentaar en dit wat deur hom en ander leiers gemaak is “in die algemeen” was en nie gefokus was op die dissiplinêre prosesse wat aan die gang is nie.
Phosa het oor die naweek tydens ‘n veldtog in Sekhukhune gesê die ANC is “nie ‘n asblik vir kamerade” nie.
Phosa het ook die kabinet se besluit om vyf Limpopo regeringsdepartemente onder administrasie te plaas bevraagteken.
– Volg Nuus24 op Twitter
- SAPA