ANCYL Limpopo "moeg vir diktator Malema"
2010-04-12 00:11
Johannesburg - Afgevaardigdes van die ANC-jeugliga (ANCYL) in Limpopo sweer hulle sal nooit die jeugliga se nuwe voorsitter, Frans Moswane, as leier erken nie, en sê hulle is moeg vir Julius Malema se "diktatorskap".
Die groep afgevaardigdes is Sondag van die ANCYL se konferensie in Limpopo verwyder, het SABC berig.
Moswane is Saterdag onbetwis tot voorsitter van die jeugliga verkies.
Die afgevaardigdes, wat Lehlogonolo Masonga in die verkiesing ondersteun het, het gesê Moswane is nie op 'n demokratiese wyse tot sy pos verkies nie ná die polisie hulle van die konferensie verwyder het.
Die groep beweer jeugligaleier Julius Malema het beveel dat hulle verwyder moet word sodat sy gunsteling kandidaat kon wen.
"Ons is moeg vir die diktatorskap van Malema. Ons gaan huis toe," het een van die afgevaardigdes gesê.
Die groep het gesê hulle sal "nooit" vir Moswane as leier erken nie.
- Sapa