ANCYL: Broederbond beheer media
2011-07-25 15:09
Johannesburg – Die ANC-jeugliga (ANCYL) het Maandag die media aangeval oor beriggewing oor Julius Malema, president van die ANCYL, se finansies en beweer die media word deur die Afrikaner Broederbond beheer.
Die afgelope naweek is berig dat Malema die trustee is van 'n geheime familietrust wat in die naam van sy vyfjarige seun se naam geregistreer is.
’n Sakeman in Malema se vriendekring sê hy het R200 000 in die trust inbetaal nadat Malema hom gehelp het om ’n regeringstender te kry. Hy weet glo van nog minstens 20 sakemanne wat dit ook al gedoen het.
Die ANCYL het bewerings ontken dat Malema geld ontvang van sakelui wat tenders in Limpopo soek.
Malema het nie Maandag die mediakonferensie bygewoon nie.
Ronald Lamola, adjunkpresident van die ANCYL, het gesê die media het 'n agenda.
"Dit is die Broederbond waarvan ons praat. Hoekom is slegs die lewe van 'n jong swart Suid-Afrikaner, die president van die jeugliga, 'n kwessie van belang?"
Sindiso Magaqa, sekretaris-generaal van die ANCYL, het aan joernaliste gesê: "Julle word beheer. Julle speel vuil politieke speletjies en ons weet dat sommige van julle – nie almal nie – befonds word."
Intussen het die jeugliga weer gesê Malema se geldsake is niemand se besigheid nie en dat hy 'n privaat persoon is en nie 'n openbare figuur nie.
– Volg Nuus24 op Twitter